МЕКСИКИЙН НЭГДСЭН УЛСАД ЗОРЧИХ НӨХЦӨЛИЙН ТАЛААР
Монгол Улсаас АНУ-д суугаа Элчин сайдын яам нь Мексикийн Нэгдсэн Улсыг хавсран суудаг билээ. Үүнтэй холбоотойгоор Монгол Улсын иргэд Мексикийн Нэгдсэн Улсад зорчих нөхцөлийн талаар доорх мэдээллийг хүргэж байна. Үүнд:
- “Дипломат болон албан паспорттой иргэд харилцан визгүй зорчих тухай Монгол Улсын Засгийн газар, Мексикийн Нэгдсэн Улсын Засгийн газар хоорондын хэлэлцээр”-ийг 2001 оны 1 дүгээр сарын 09-ний өдөр Нью-Йорк хотноо байгуулсан. Уг хэлэлцээрийн дагуу Монгол, Мексикийн дипломат, албан паспорттай иргэд 90 хоног хүртэл харилцан визгүй зорчиж байна.
- Энгийн паспорттай иргэд дараах нөхцөлд Мексикийн Нэгдсэн Улсад аялал жуулчлалын зорилгоор 180 хүртэл хоног визгүй зорчих боломжтой. Үүнд:
• АНУ, Канад, Япон, ИБУИНВУ, Шенгений бүсийн аль ч улс болон Номхон далайн холбооны гишүүн улсууд (Чили, Колумби, Перу)-д байнга оршин суудаг болохыг нотлох баримт бичиг;
• АНУ, Канад, Япон, ИБУИНВУ, эсхүл Шенгений бүсийн аль нэг улсын хүчин төгөлдөр визтэй бол;
• Мексикийн Нэгдсэн Улс хүлээн зөвшөөрдөг АПЕК-ын бизнесийн аялалын карттай бол (APEC Business Travel Card (ABTC));
• Хүрэлцэн ирсэн агаарын хөлгийнхөө багийн гишүүн болохыг нотолсон гэрчилгээтэй бол;
• Мексикийн далайн боомтод хүрэлцэн ирж буй хөлөг онгоцны багийн гишүүн болохыг нотолсон баримт бичигтэй бол.