Америкийн Нэгдсэн Улсын Төрийн нарийн бичгийн даргын орлогч Др. Курт М.Кэмпбэлл 2024 оны 3 дугаар сарын 21-22-ний өдрүүдэд Монгол Улсад айлчилж байна.

Айлчлалын хүрээнд Гадаад харилцааны яамны Төрийн нарийн бичгийн дарга Н.Анхбаяр, Америкийн Нэгдсэн Улсын Төрийн нарийн бичгийн даргын орлогч Курт Кэмпбэлл нар 2024 оны 3 дугаар сарын 22-ны өдөр ГХЯ-нд хэлэлцээ хийлээ. Хэлэлцээний үеэр талууд Монгол Улс, Америкийн Нэгдсэн Улсын Стратегийн гуравдагч хөршийн түншлэлийг бэхжүүлэх, харилцаа, хамтын ажиллагааг харилцан сонирхсон бүхий л салбарт өргөжүүлж, шинэ шатанд гаргах эрмэлзэлтэй байгаагаа харилцан нотлов.

АНУ-ын Төрийн нарийн бичгийн даргын орлогч Курт Кэмпбэлл халуун дотноор хүлээн авч буй монголын талд талархал илэрхийлээд, Монголыг сайтар мэддэг хүний хувьд АНУ-ын Төрийн нарийн бичгийн даргын орлогчийн албан тушаалд томилогдсоноосоо хойш ийнхүү Монгол Улсад дахин ирж байгаадаа баяртай байгаагаа илэрхийлэв.

Хоёр тал Монгол Улсын Ерөнхий сайд Л.Оюун-Эрдэнэ 2023 оны 8 дугаар сард АНУ-д хийсэн албан ёсны айлчлал болон 2023 оны 12 дугаар сард болсон Монгол Улсын ГХЯ, АНУ-ын Төрийн департамент хоорондын XVI Зөвлөлдөх уулзалт болон II Стратегийн яриа хэлэлцээний үеэр ярилцаж тохиролцсон асуудлуудын хэрэгжилтийн талаар мэдээлэл солилцож, дэлгэрэнгүй ярилцлаа.

Мөн хоёр улсын харилцааг эдийн засгийн агуулгаар баяжуулах хөшүүрэг болох Стратегийн гуравдагч хөршийн түншлэлийн эдийн засгийн хамтын ажиллагааны тухай Замын зураглалын хэрэгжилтийг бүрэн хангах чиглэлээр нягт хамтран ажиллахыг чухалчлав.

Хэлэлцээний дараа Төрийн нарийн бичгийн дарга Н.Анхбаяр, Төрийн нарийн бичгийн даргын орлогч Курт Кэмпбэлл нар хэвлэл, мэдээллийн төлөөлөгчдөд мэдээлэл өгч, асуултад хариулав.